నా మనసు.. నీ హృదయానికి చిక్కుకుంది.. చూడు

స్వేచ్ఛగా ఎగిరే గాలిపటం
చెట్టు కొమ్మకు చిక్కుకున్నట్టు..
పరుగులు తీసే తువ్వాయ్..
కట్టు కొయ్యకు తగులుకున్నట్టు..
నా మనసు..
నీ హృదయానికి చిక్కుకుంది..

బంధీకావడంలో మాధుర్యం..
చిక్కుకోవడంలోనూ సంతోషం..
నా మనసుకు బాగా వంట బట్టినట్టుంది..
అందుకే..
నేనెంత స్వాతంత్ర్య పోరాటం చేసినా..
నిన్నొదిలి రానంది..
ఏమందు పెట్టావో గానీ
నా మాట అసలు వినకుంది
ఏం నేర్పి పెట్టావో కానీ..
నీ తలపే ఎక్కువైంది..
నా వునికే ప్రశ్నార్థకమైంది..

ఏం చేయను నేనూ రాజీ కొస్తున్నా
నా మనసు బాటనే పడుతున్నా..
అవునన్నా కాదన్నా..
నేను నువ్వయ్యే క్షణం కోసం చూస్తున్నా..

--నాగ్