ఖో ఖో.. మన రాష్ట్రం నుంచి ప్రాతినిథ్యం వహించిన ఏకైక క్రీడాకారుడు సతీష్

జనవరి 29, 2017, రాత్రి ఎనిమిది గంటల సమయం..
ఇండియా - ఇంగ్లాండ్ ట్వంటీ ట్వంటీ క్రికెట్ మ్యాచ్ జరుగుతోంది.
ఇప్పటికే ఒక మ్యాచ్ ని కోల్పోయిన కొహ్లీ సేన చాలా పట్టుదలగా ఆడుతోంది. కానీ చాల తక్కువ స్కోర్ కే ఇండియా బ్యాట్స్ మెన్ పెవిలియన్ కి వచ్చేశారు.
తక్కువ స్కోర్ లక్ష్యంగా బ్యాటింగ్ కి దిగిన ఇంగ్లాండ్ విజయం వైపు దూసుకు పోతోంది.
మన బౌలర్స్ ఇంగ్లాండ్ ని కట్టడి చేయడానికి స్లాగ్ ఓవర్స్ చమటోడ్చుతున్నారు. ప్రతి బంతీ ఉత్కంఠ.
సహజంగానే ఇండియాలోని క్రికెట్ ప్రేమికులు టీవీలకు అతుక్కుపోయారు. క్రికెట్ చూస్తున్నారు.
విజయం ఇండియా- ఇంగ్లాండ్ మధ్య దోబూచులాడుతోంది.
సరిగ్గా..
అదే రోజు..
అదే సమయంలో
అదే ఇంగ్లాండ్ క్రీడాకారులకు మరోచోట చమటలు పడుతున్నాయి.
ఇండియా కుర్రాళ్లు.. తెల్ల కుర్రాలతో ఒక ఆట ఆడేసుకుంటున్నారు..
ఆ ఆటే ఖో ఖో..
న్యూ ముంబాయి స్టేడియంలో ఇండియా వెర్సస్ ఇంగ్లాండ్ టెస్ట్ జరుగుతోంది
ఆది నుంచీ మన క్రీడాకారులు ఇంగ్లాండ్ పై ఆధిపత్యంతో ముందుకు దూసుకు పోయారు.
అయిదు పాయింట్లతో విజయం సాధించారు.
ఈ విజయంలో ఆంధ్ర ప్రదేశ్ కు అందునా తూర్పుగోదావరి జిల్లా, పిఠాపురం మండలం విరవ కుర్రాడు యాళ్ల సతీష్ ఆల్ రౌండ్ ప్రతిభ చూపించాడు.
మన రాష్ట్రం నుంచి ప్రాతినిథ్యం వహించిన ఏకైక క్రీడాకారుడు సతీష్
ఇతను పిఠాపురం మహరాజా డిగ్రీ కళాశాల(ఆర్ ఆర్ బి హెచ్ ఆర్ ప్రభుత్వ డిగ్రీ కళాశాల) లో బికామ్ చదువుతున్నాడు.
అయితే దురదృష్టం.. ఇండియాలోనే కాదు చివరికి విరవ గ్రామంలో కూడా జనాలకి ఈ విజయం తెలీదు.
ప్రసార మాథ్యమాల్లో ఏ మూలా ఈ విజయానికి చోటు దక్కలేదు
గెలిచింది అంతర్జాతీయ మ్యాచ్ అయినా స్థానికంగా కూడా విలువ లేదు.
28 రాష్ట్రాల క్రీడాకారులు పోటీ పడితే .. ఎంపికైన 15 మందిలో ఒక్క ఆంధ్రుడికి స్థానం దక్కడం.
అదీ మా పిఠాపురం మండలం వాడికి ఆ గౌరవం దక్కడం నిజంగా చాలా గర్వ కారణం.
సతీష తండ్రి సత్తిబాబు గారు, సైకిల్ మీద వస్తువులు అమ్మే వ్యాపారి. తల్లి సత్యవతి గారు హౌస్ వైఫ్
సతీష కోచ్ పీఈటీ రాంబాబు గారు.
సతీష్ ఇప్పటికి 16 సార్లు రాష్ట్రం తరుపున ఆడాడు
మూడు బంగారు పలు రజత పథకాలు సాధించాడు
సతీష్ త్వరలో ఇంగ్లాండ్ లో జరగబోయే ఖో ఖో టెస్ట్ ల్లో ఆడనున్నాడు
శుభాకాంక్షలు సతీష
మరియు
ఆల్ ది బెస్ట్

-- సరిదే నాగ్
ఫోటో : ఖో ఖో క్రీడాకారుడు యాళ్ల సతీష్ , పిఠాపురం మండలం విరవ

జ్వాలాతోరణం

సర్వ పాపహరం..

నరక బాధా విముక్తి కారకం..

జ్వాలాతోరణం

సాగర మథనం సమయంలో పాలకడలి నుంచి పుట్టిన ఆలాహలాన్ని పరమశివుడు స్వీకరించి తన కంఠంలో నిలిపుతాడు. అయితే ఆలాహలం మంటలకు శివునికి ఎక్కడ ప్రమాదం జరుగుతుందో అని పార్వతీదేవి సహజసిద్దమైన బేలతనం వల్ల భయపడుతుంది. తన భర్తకు ఆలాహలం మంటలు వల్ల ఏమీ కాకుండా వుండాలని దానికి ప్రతిగా ప్రతి కార్తీక పౌర్ణమికి తన భర్తతో సహా జ్వాలాతోరణం దాటుతానని అగ్నిదేవునికి మొక్కుకుంటుంది. శివునికి ఏమీ కాలేదు. ఈ కారణంగా ప్రతి కార్తిక పౌర్ణమి రోజునా పరమేష్టి పరమశివుని సహా జ్వాలాతోరణం దాటుతుంది

ఈ తోరణాన్ని కొత్తగడ్డితో చేస్తారు. కొత్త గోగునారని తాడుగా పేని రెండు వేప చెట్లకు మధ్యగా తోరణంలా కడతారు. కొత్తగడ్డిని అంటించగానే అది రెపరెపలాడుతూ కాలిపోతుంది. ఆ మంట ఆరేలోగా స్వామి వారిని మూడు మార్లు తోరణం కిందుగా తీసుకు వెళ్తారు.

భక్తులు ఈ జ్వాలతోరణం కిందిగా వెళ్తే నరక బాధలు తప్పుతాయని నమ్మకం. కైలాస ద్వారం తెరుకుంటుందని చెబుతారు

అలాగే తోరణం మండగా మిగిలిన గడ్డిని రైతులు ధాన్యం గాదెల్లో వేస్తారు. పశువులకు తినిపిస్తారు దీనివల్ల పాడి పంటలు సమృద్దిగా లభిస్తాయని నమ్ముతారు.

గడ్డి మండగా మిగిలిన నుశిని బొట్టులా పెట్టుకుంటారు. దీనివల్ల నరదిష్టి, భూత ప్రేతాత్మల పీడా వుండని నమ్మకం.

ఇది అంతా పెద్దలు చెప్పిందే దీనిలో తర్కానికి చోటు లేదు

పాటిస్తే వచ్చే నష్టమూ లేదు. కానీ తోరణం దాటేప్పుడు మెళకువగా లేకపోతే అగ్నిప్రమాదాలు జరగొచ్చు.

ఎందుకంటే గడ్డి మండుతూ రాలుతూ వుంటుంది. స్వామి అమ్మవార్లను కూడా చాలా వేగంగా తోరణం కిందుగా తిప్పుతారు

-- సరిదే నాగ్

ఫోటోలు పాదగయా క్షేత్రం పిఠాపురం లో జ్వాలా తోరణం

-- సరిదే నాగ్

పాదగయా క్షేత్రంలో జ్వాలాతోరణం

బంతి .. బంతి పూల తోట

బుంగమూతి పూ బంతి..

పలుకనంటే ఎలా చెప్పుమరి..

క్రీగంటచూసి.. ఆశ రేపి..

ముడుచుకుంటే పాపమే సొగసరి

నీ తనువు బంగారం..

పలుకు కూడా బంగారమే..?

అర్భకుడిని తాళజాలనే..

కనులెదుట నిన్ను చూసి.. తాకకనే..

-- సరిదే నాగ్

ఫోటో : మాధవపురం బంతి పూల తోటలో

మునగాకు Drum stick leaves

ఈ రోజు

మునగాకు ఫ్రై..

దీనిలో  పీచు పదార్ధము ఎక్కువగా ఉంటుందట..

 ఎ, సి, విటమిన్లు , ఇనుము, క్యాల్సియం , పొటాషియం, తదితరాలు సమృద్దిగా వుంటాయట.

మా ఇంటి దగ్గర్లో చాలా మునగ చెట్లు వున్నా ఎప్పుడూ తినలేదు

ఈరోజే మొదటి సారి తినడం

-- సరిదే నాగ్

kummari కుమ్మరి prameda

ఆ వేళ్లకు ఇంద్రజాలం తెలుసు..

మట్టి నుంచి కళాఖండాల్ని తీస్తోంది..

అతని చేయి తగిలిన మన్ను.. 

మురిసి మెలికలు తిరుగుతోంది.. 

కరిగి మృణ పుష్పంలా విరబూస్తోంది..

అతని చమటకు పరిమళం వుంది..

మట్టితో కలిసి గుభాళీస్తోంది..

గిర్రున తిరిగే 'సారె' అక్షయ పాత్ర అనుకుంటా..

ఎన్ని పాత్రలు సృష్టిస్తొందో.. 

మట్టి నుంచి అతను చక చకా ప్రమిదలు తీస్తుంటే..

నా కనులు ఆల్చిప్పలయ్యాయి..

మనిషిని చేసినోడు బ్రహ్మ అయితే..

మట్టిని ముంతచేసినోడూ బ్రహ్మే కథా..

----

 మట్టిప్రమిదల్లో నూనె దీపం మన సంప్రదాయం..

కుమ్మరి సారెపై చేసిన ప్రమిదలతోనే దివ్వెల పండుగ  చేసుకుందాం

చైనా మతాబులొద్దు.. కుండ చిచ్చుబుడ్డే వెలిగిద్దాం..

మన కళను బతికిద్దాం.. కుమ్మరన్నను కాపాడుకుందాం

-- సరిదే నాగ్

నోట్ : కాపీ చేయొద్దు, షేర్ చేసుకోవచ్చు

ఫోటో : మా

కుమ్మరి వీధిలో ప్రమిదలు, చిచ్చుబుడ్డి గుల్లలు చేస్తున్న కార్మికుడు

cheeramenu చీరమేను చిరుమేను

గోదారి ప్రజలు.. కోనసీమ వాసులకు మాత్రమే ప్రకృతి ఇచ్చిన మరో వరం చీరమేను

సేమియాలా తెల్లగా పొడవుగా కనిపిస్తున్నవి చేపలు.చేప పిల్లలు

వీటిని సేరుమేను, చీరమేను, చిరుమేను అని పిలుస్తారు.  

గోదావరి తీరంలోని ప్రజలకు మాత్రమే లభించే మరో మత్స్య సంపద ఈ చీరమేను.

ఇవి ఒక జాతి చేపల పిల్లలు. ఎక్కువగా గోదావరి ఎర్రనీరు వచ్చే సమయంలో ఈ చీరమేను లభిస్తుంది. దసరా నుంచి దీపాలవళీ వరకూ ఇవి లభిస్తాయి. 

మత్స్యకారులు వీటిని రంగుల చీరలు వలలా చేసి పట్టడం వల్ల వీటిని చీరమేనులు అంటారు. 

అతిచిన్న చేపలు కావడం వల్ల ఇవి సాదారణ వలలకు దొరకవు.

గుంపుగా వేలు లక్షల సంఖ్యలో సంచరించే చేపల్ని మత్స్యకారులు పట్టి అమ్ముతారు. 

అలాగే అతి చిన్న శరీరం కలిగి వున్నందున్న వీటిని చిరుమేను అని కూడా అంటారు. 

ఇంకో విశేషం వీటిని సోల, తవ్వా, శేరు లెక్కల్లో అమ్ముతారు. 

ఒక శేరు రూ. వేయి వరకూ పలుకుతోంది. శేరుల లెక్కన అమ్ముతారు కాబట్టి వీటిని శేరుమేను అని కూడా పిలుస్తారు. గతంలో కుంచం చీరమేను రూ.3వేలు వుండేది. 

పులసకు ఎంత ప్రాశస్త్యం వుందో గోదావరి తీరంలో చీరమేనుకూ అంతే డిమాండ్ వుంది 

క్యారేజీలు, బిందెలల్లో వీటిని తెచ్చి అమ్ముతారు. 

చీరమేనుతో మషాలా పెట్టి పిట్టు వండుతారు, గారెలు చేస్తారు. 

చాలా రుచిగా వుంటుంది.  దీనిని వండితే బాసుమతి బియ్యంతో బిరియానీ చేసినట్టుగా వుంటుంది. 

అంత రుచీ వుంటుంది.  గారెలైతే చెప్పక్కర్లేదు.. అద్భుతమైన రుచి. అందుకే అంత రేటు.

-- సరిదే నాగ్

ఫోటో : బిందె, బకెట్ల లో చీరమేను, సోల, తవ్వా లెక్కల్లో చీరమేను అమ్ముతున్న మత్య్సకార మహిళ

నోట్ : కాపీ చేయొద్దు, షేర్ చేసుకోవచ్చు

పసోడి నెత్తిన పచ్చగడ్డి బరువు

పసోడి నెత్తిన పచ్చగడ్డి బరువు
పశువు గిట్టలకింద ఆడి చదువు.
పొట్టకోయనక్కర్లేదు.. ఆడిపొట్టలేవు అక్షరాలు..
పాలికాపుతనమే ఆడి ఇంటికి ఆదరవు
ఊరికే అరుస్తాయి పేగులు ఆకలి అరుపు..

బలిసినోళ్ల బ్రహ్మ చెవుడు..
అందుకే వినిపించదు పిల్లోడి గోడు
నేతల నాలుకకు నరం లేదు..
చెప్పిందే చెబుతాయి అభ్యుదయం అబద్దాలు..

గ్రామ ప్రగతే దేశ ప్రగతి..
బాపూ చూడు ఈ బుడ్డోడి గతి
స్వరాజ్యమిచ్చి.. చక్కా పోయావు
సురాజ్యం కాస్తా అసురుల పాల్చేశావు
పెంటకుప్పలపై రేపటి బాలలు..
మెతుకులేరుతున్నారు చూడు
మహాత్మా మళ్లీ పుట్టొద్దు..
అసమర్థులు.. అయోగ్యుల చేతిలో దేశాన్ని పెట్టొద్దు..
మరోసారి ఆ తప్పు మళ్లీ చేయొద్దు..

-- సరిదే నాగ్

ఫోటో : కొత్తపల్లి మండలం రామ రాఘవపురం లో తీసింది