చిరుగజ్జెల ఘణఘణ
తామరాకులాంటీ పాదాలపై.. నీటి అల'జడి'
నా హృదయంలో ఏదో అలజడి
నువ్వొస్తావన్న మాట.. నాలో కోటి వీణలు మీటితే..
నువ్వు రాలేదన్న సత్యం..నాలో నిశ్శబ్ద వేదన మిగిల్చింది
నీ ఊహ మది తట్టగానే..
పారే నదిలో వున్నా.. పరువం వేడెక్కుతోంది
మాట తప్పావన్న బాధను..
నీ జ్ఞాపకాల ఆనందం అణిచేస్తోంది..
అలగాలని చూసినా.. ఏమిటో ప్రేమే వస్తోంది..
కోపంగా వెళ్లాలని ప్రయత్నించిన ప్రతిసారీ..
నా కాళ్ళు కదలడం లేదు..
కోపంగా ఎర్రబారిన కళ్ళను..
నీ తలపులో.. కవ్వింపులో.. సిగ్గులో..
ఎరుపెక్కిన చెక్కిలి డామినేట్ చేస్తోంది.
ఇప్పుడు నువ్వు రాకుంటేనే నయం..
విరహం ఆవిష్కృతమైన నన్ను చూసి లోకువ చేస్తావు
నిన్ను చూసిన వెంటనే అదిరే అధరాలు..
నీ వైపు అసంకల్పితంగా కదిలే కాళ్ళు..
కెంజాయి రంగు పులిమిన చెక్కిలి..
అసలుకే ఒంపు.. నిను చూసిన సందడిలో
మరింత మెలికలు తిరిగిన నడుము..
విల్లులాంటీ మేడపై.. పట్టిన చమట
నన్ను నీకు పట్టిస్తాయి..
నది సవ్వడిని మించిన నా మనసు ఘోషను నీకు వినిపిస్తాయి..
ఇక నువ్వు నన్ను లెక్క చేస్తావా..
కోంటేగా.. ఆట పట్టించవూ..
నీ సంగతి తెలిసిందిలే అన్నట్టు.. సన్నని మందహాసం
పెదవి విరిపుతో వెక్కిరిస్తే తట్టుకో గలనా..
కోపం.. అలకలను నదిలో కలిపేసి..
పరుగున ఒచ్చి నీ ఒడిలో గువ్వలా ఒదిగిపోనూ..
ఏమున్నది నేస్తం.. ఆ చూపులో
నాలో ఏమీ లేకుండా చేస్తున్నావ్ నిమిషంలో
ఏమున్నది ప్రియా ఆ చేతి స్పర్శలో..
నాకు అన్నీ ఇచ్చి ఏమీ లేనివాడవవుతావ్
--నాగు
No comments:
Post a Comment