పండు వెన్నెల.

పండు వెన్నెల..
చల్లని.. మలయ మారుతం
చుట్టూ నిశ్శబ్దం..
ప్లేబ్యాక్ లా సెలయేటి గలగల
ఎర్రని అంచు..
తెల్లని కాటన్ చీరలో నువ్వు..
చేతిలో వెండి పల్లెం..
వెన్నెలను తలదన్నేలా..
వెన్నలొలికే పెరుగన్నం..
నీ చిరునవ్వు ఆహ్వానం..
తినడానికా.. మరి...!
ఆత్రంగా పరుగున నేను..
అందవే.. ఊరించుతావే..
ఆకలిగా నేను..
చిక్కవే.. చిలిపిగా నవ్వుతావే..
అలిగి నేనాగితే..
గోరుముద్దతో నువ్వు ప్రత్యక్షం
ముద్దు లేనిదే.. ముద్ద దిగదని
నేను మారాం..అంతలో
వెండి మబ్బుమాటుకు.. వెన్నెల
గోరు ముద్ద.. ముద్దా..
తేల్చుకునే లోగా..
మాయదారి చందమామ
వెన్నెల కురిపించింది..
నా నోటికి పెరుగన్నం..
నీ పెదాలకు అంటిన మెతుకు..
ఈ ఆనందం చాలు కదూ..
ఈ బతుకుకు..
--నాగ్